Tilskot til inkludering og mangfald

LivOGLyst er eit program og nettverk for deg som ønskjer å vidareutvikle lokalsamfunnet ditt. Eit LivOGLyst-prosjekt skal legge til rette for at alle som bur i området, får høve til å bidra. No kan du gjennom ein friviljug organisasjon søkje om tilskot.

Kva saknar du og andre i ditt lokalsamfunn? Fleire møteplassar, fleire aktivitetar, fleire gode samtalar i kvardagen?  

Føremålet med LivOGLyst er å styrkje lokalsamfunnet i brei forstand; styrkje lokal identitet, lysta til å bu og lokalt næringsliv. 

Programmet handlar om å mobilisere dei som bur i eller har tilknyting til området. Det gjer ein gjennom å samla folk på tvers av alder og andre sosiale skilnadar og saman peike ut ein veg mot eit meir levande og inkluderande nærmiljø. Næringsutvikling kan vere ein del av dette.

LivOGLyst er eit program som er utforma og blir gjennomført i eit samarbeid mellom Vestland fylkeskommune, Statsforvaltaren i Vestland og Innovasjon Noreg Vestland.

Kven kan søka?

Her er alle velkome til å søka –det vere seg bygda sine etablerte eldsjeler eller dei nysgjerrige nytilkomne! 

Men det er eit krav at arbeidet må forankrast i lokalsamfunnet med eit frivillig lag/foreining som eigar og leiar av prosjektet. Dette laget må ha eit organisasjonsnummer.  

Fleire organisasjonar kan gjerne samarbeide om eit LivOGLyst-prosjekt – det samsvarar ypparleg med programmet sitt fokus på brei mobilisering.  

Om du ikkje tilhøyrar ein etablert organisasjon, men tenkjer at LivOGLyst er noko for deg og ditt lokalsamfunn – kontakt din kommune og få hjelp til å starta opp. 

• Eit frivillig lag/foreining må eige prosjektet 
• Ei arbeidsgruppe på minimum 5 personar skal ha hovudansvar for prosjektet 
• Kommunen eller andre utviklingsaktørar kan vere med som initiativtakar til søknad. 

Kva tilbyr vi?

• Nettverk med andre eldsjeler i LivOGLyst-programmet 
• Samlingar og konferansar for LivOGLyst-prosjekt i Vestland fylke 
• Kursing i prosjektmetodar 
• Rettleiing i prosjektarbeidet 
• Økonomisk tilskot

Alle LivOGLyst-prosjekt byrjar som eittårige forprosjekt; eitt år hovudsakeleg til å mobilisera, kartlegga og identifisera ønskje og idear i lokalsamfunnet. 

LivOGLyst-forprosjekt (eittårig) vert tildelt finansiell stønad for eitt år, kr 80 000 
Etter forprosjektsperioden kan ein søka om å verte hovudprosjekt. Om innvilga får ein stønad i tre år til å vidareutvikla LivOGLyst-prosjektet. 

LivOGLyst-hovudprosjekt (treårig) vert tildelt finansiell stønad, kr 390 000 fordelt over tre år.   
For hovudprosjekt skal også den aktuelle kommunen bidra med finansiell stønad til prosjektet, kr 90 000 fordelt over ein treårig periode. 

Kva kan tilskotet gå til? 

• Prosjektleiing (inntil 50%) 
• Kompetanseheving/kurs 
• Nettverksbygging 
• Mobilisering 
• Innkjøp som mogleggjer planlagde aktivitetar

Kva forventar vi?

• Ein god søknad, innan fristen 
• Eit formalisert samarbeid mellom kommunen og prosjektet. Støtteerklæring frå kommunen skal leverast som vedlegg til søknaden. Kommunen skal utpeika ein kontaktperson for prosjektet. For LivOGLyst-hovudprosjekt skal kommunen medverke med minst kr 30 000 årleg til prosjektet
• Deltaking på samlingar og den årlege LivOGLyst-konferansen
• Årleg skriftleg rapport om prosjektstatus

Les meir og søk elektronisk på vestlandfylke.no

Vi lyser ut midlar til læreplassgaranti for å sikre god balanse mellom tilbod og etterspurnad av læreplassar.
Fylkestinget har sett av 1.4 millionar til prosjekt knytt til læreplassgaranti. Kriteria for utlysinga er vedteke i hovudutval for næring.

Prosjektet må oppfylle minst eitt av tre føremål:

• Jobbe for læreplassgaranti i regionen eller ved ein eller fleire skular i regionen.
• Nytte læreplassgarantien til å marknadsføre skulane for å rekruttere fleire elevar/lærlingar.
• Ha andre tiltak som kan vere med å sikre ein god balanse mellom tilbod og etterspurnad av læreplassar.

Andre vilkår

• Det krev ein eigeninnsats på 10 prosent. Denne treng ikkje være i form av friske midlar, men kan komme frå til dømes arbeidstimar.
• Inntil 75 prosent av tilskotet kan utbetalast straks ved tilsegn om støtte. Sluttutbetaling av resterande 25 prosent kan skje etter innsendt sluttrapport og godkjent rekneskap.
• Prosjektet må ha ein sluttdato innan eit år frå startdato.

Kven kan søke?

Dei sju lokale kompetanseforuma som er etablert i samarbeidsmodellen knytt til Kompetanseforum Vestland er: Kompetanseforum Nord, Samarbeidsarena Sunnhordaland, Kompetanseforum Fjordane, Hardanger/Voss, Sogn, Bergen og Vest. Søknadene til ordninga skal være forankra i dei lokale kompetanseforuma. Dei lokale kompetanseforuma vurderer kven som skal stå som lokal søkjar på vegne av regionen. Det kan berre søke om midlar til eit prosjekt per region.

Alle søknader som tilfredsstiller krava kan få tildelt 200.000 kroner. Det er mogleg å søkje om eit større beløp. Ekstra midlar vil bli tildelt om ikkje alle regionane søkjer på ordninga.

Les meir og søk elektronisk på vestlandfylke.no

Kommunar i Vestland kan no søkje fylkeskommunen om inntil 50 000 kr til oppstart eller nyutvikling av tilbod for e-sport og gaming. Søknadsfristen er 1. juli.

Vestland fylkeskommune lyser ut til saman 205 000 kr i tilskot for å følgje opp strategi for e-sport og gaming. Tilskotet kan vere starthjelp til gode lokale tilbod som kan vere modellar for andre kommunar. Tilskotet føreset kommunal eigendel.

Kommunane blir oppmoda til å sjå på høve for sambruk og fleirbruk for implementering av e-sport og gaming i arenaer for kultur og idrett. Det kan til dømes vere løysingar for bruk av ulike rom, for utlån av ressursar på tvers av både lag, hus og kommunar eller konkrete samanarbeid mellom aktørar.

Kva kan få støtte?

Tiltak i kommunane som gjeld oppstart eller nyutvikling av tilbod for e-sport og gaming kan få støtte. Tiltaka skal vere gode modellar som kan gi kunnskap og inspirasjon til andre som skal legge til rette for liknande tilbod.

Tiltaka må svare på følgjande punkt frå strategi for e-sport og gaming i Vestland:

Delmål 1. Hindre utanforskap og sikre sosial berekraft
Punkt a) Legge til rette for deltaking og inkludering.
Punkt c) Tilpasse og vidareutvikle eksisterande tilskotsordningar som verkemiddel for deltaking og oppstart av tilbod

Delmål 2. Utvikle tilbod i breidde, topp og som del av vidaregåande opplæring
Punkt a) Samarbeide med relevante aktørar for å utvikle organisert tilbod i kommunar og idrettslag

Kven kan søkje?

Kommunane i Vestland.

Søknadsfrist

1. juli 

Krav til søknaden

• Søknaden skal fremjast på elektronisk søknadsskjema.
• Søknaden skal innehalde tilstrekkeleg informasjon/dokumentasjon om prosjektet (sjå under punktet over kva som kan få støtte) med budsjett og plan for gjennomføring.
• Med søknaden må det følgje garanti om kommunal eigenandel, kronesum minimum tilsvarande søknadssum.

Vurdering

Ei heilskapsvurdering med bakgrunn i overordna mål for ordninga, tiltakets kvalitetar, plan og budsjettering ligg til grunn for eventuelt tilskot eller avslag. Søknadane vert vurderte og prioriterte ut frå følgjande kriterium:

• At det kjem tydeleg fram kvifor ein vil gjennomføre prosjektet, og kva mål ein vil oppnå.
• Korleis prosjektet er forankra i lokale behov, overordna planar og føringar.
• At tiltaket fører til eit utvida tilbod for publikum.

Handsaming og vedtak

Forvaltningslova skal leggjast til grunn for all søknadshandsaming i Vestland fylkeskommune, og alle søknader er i utgangspunktet offentleg tilgjengelege.

Avdeling for kultur, idrett og inkludering førebur søknadane for handsaming og vedtak i hovudutval for kultur, idrett og inkludering 30. august.

Oppfølging og rapportering

Vilkår og retningslinjer for gjennomføring av tiltak går fram av tildelingsbrevet. Tilskotet må brukast i samsvar med planlagde aktivitetar på den måten og i det tidsrommet som går fram av søknaden.

Eventuelle vesentlege endringar i prosjektet må meldast skriftleg til fylkeskommunen for vurdering og godkjenning.

Tilsegn om tilskot gjeld i inntil eitt år frå svar om vedtaket er sendt til søkjaren. Tilsegna fell bort, og midlane vert inndregne dersom

• tiltaket ikkje er igangsett innan eitt år etter tildeling
• søkjaren ikkje har bede om utbetaling av tilskotet i samsvar med dokumentert framdrift og likviditetsbehov innan to år etter svar er sendt ut

Tilsegnsmottakar skal rapportere og sende inn rekneskap innan tre månader etter at tiltaket er gjennomført, seinast 1. august påfølgjande år. Krav til rapportering blir sendt ut saman med eventuelt vedtak om støtte.

Tilskotsmottakar pliktar seg til å dele erfaringar frå prosjektet med andre i ulike samanhengar. Fylkeskommunen og fylket sin revisor skal ha høve til å setje i verk kontroll med at midlar vert forvalta som føresett. Fylkeskommunen og fylket sin revisor skal ha rett til dei dokument og opplysningar ein finn påkravd for kontroll.

Les meir og søk elektronisk på vestlandfylke.no

Tilskotsordninga tilsvarar den som tidlegare heitte "Tilskot til drift for kunst, kultur og idrett". Ordninga og retningslinene er justert i høve avdeling for kultur og folkehelse sine fagområde.

Søknad om driftsstøtte er del av budsjettprosessen for følgjande år. Endeleg vedtak om tildeling vert gjort i sektorbudsjett for kultur og folkehelse

Vurdering og tildeling av tilskot skjer i tråd med fylkeskommunale styringsdokument:

Utviklingsplan for Vestland 2020-2024
Kultur bygger samfunn - regional plan for kultur 2023-2035
Handlingsprogram for folkehelse 2022-2025
Rettleiar for tildeling av tilskot i Vestland fylkeskommune
Føremål med tilskotsordninga
Gjennom ordninga skal fylkeskommunen fremje og støtte opp under eit aktivt og allsidig sivilsamfunn i fylket innafor kunst, kultur, idrett, friluftsliv, folkehelse og inkludering.

Vestland fylkeskommune gir tilskot til drift av organisasjonar og institusjonar som har ein sterk og tydeleg verdi for kunst, kultur, idrett, friluftsliv, inkludering og folkehelse i heile eller store deler av Vestland fylke. Tilskot til drift er fylkeskommunen sitt viktigaste verkemiddel for å støtte aktørar til å drive verksemd eller utføre oppgåver i tråd med regionale eller nasjonale interesser som fylkeskommunen har eit ansvar for.

Kvar tildeling skal grunngjevast med klår forankring i fylkespolitiske målsettingar. Grunngjevinga skal vere tydeleg formulert og tilgjengeleg, både internt og for allmenta.

Fylkeskommunen forvaltar og fordeler spelemidlar, som kjem av overskotet til Norsk Tipping og er administrert av Kulturdepartementet. Midlane skal nyttast til anlegg for idrett, friluftsliv og fysisk aktivitet i Vestland fylke. Søknadsfristen er 15. januar.

Kven kan søke?

Dei som kan søkje om spelemidlar er hovudsakleg kommunar, idrettslag, enkelte friluftslivsorganisasjonar og velforeiningar. Andre lag og organisasjonar kan også bli godkjende søkarar avhengig av laget sine vedtekter.

Søknadsfrist

Søknadsfrist for kommunane er 15. januar. Kommunane har også ulike fristar for innsending for frivillig sektor. Kontakt din kommune for informasjon om lokal frist. 

Kva kan du søke om?

Du kan søkje om tilskot til etablering og rehabilitering av mange ulike typar idrettsanlegg, anlegg for friluftsliv og anlegg for eigenorganisert fysisk aktivitet. Søknadsordninga er delt inn i to hovudgrupper, ordinære anlegg, som er vanlege idrettsanlegg, og nærmiljøanlegg, som er mindre anlegg hovudsakleg for eigenorganisert fysisk aktivitet.

Korleis søker du?

Du søker via www.anleggsregisteret.no. Søknaden vert først behandla av kommunen, som vidaresender den til fylkeskommunen.

Korleis blir pengane fordelte?

Vestland fylkeskommune fekk 236 mill kr til fordeling i 2022. Midlane vart fordelte på bakgrunn av fastlagde kriterium frå Kulturdepartementet, vedteken anleggspolitikk for Vestland fylkeskommune, samt kommunane sine prioriteringslister.

Les meir og finn relevante lenker på vestlandfylke.no

Stipendet skal medverke til at unge og lovande e-sportutøvarar får høve til å vidareutvikle seg og motivere til vidare satsing.
Utviklingsstipendet er på 40 000 kr og vart delt ut for første gong i 2021. Søknadsfristen er. 1. oktober.

Stipendet går til ein utøvar som markerer seg med gode nasjonale og internasjonale prestasjonar innan e-sport. Ein person kan berre få stipendet ein gong.

Kven kan søkje?

Utøvar sjølv, trenar eller klubb kan sende inn søknad på vegne av utøvar. Søkjaren må vere mellom 16 og 25 år og representere ein klubb eller eit organisert e-sportmiljø i Vestland fylke. Hugs å legge inn gamer-tag.

Utøvarar som har sponsoravtalar fell utanfor stipendordninga.

Kriterium ved tildeling

Vi legg vekt på desse kriteria i tildelinga - svar utfyllande i søknadsskjema.

• prestasjonar
• potensial
• planar for vidare satsing

Vestland fylkeskommune får fagleg bistand av Vestlandet E-sport med vurdering av søknadane.

Rapportering

Den som får stipendet skal innan eit år gje ein kort, skriftleg rapport om korleis stipendet har vore nytta.

Les meir og søk elektronisk på vestlandfylke.no

Vestland fylkeskommune deler kvart år ut ni utviklingsstipend à 40 000 kr til unge idrettsutøvarar. Søk innan 1. oktober.
Stipenda går til utøvarar som markerer seg med gode nasjonale og internasjonale prestasjonar innan sin idrett. Ein person kan berre motta stipendet ein gong.

Målet med stipendet er å gje mottakarane høve til å vidareutvikle seg innan den aktuelle idretten. Stipendet skal også vere ein stimulans til vidare satsing.

Vi legg vekt på desse kriteria i tildelinga

• idrettsprestasjonar
• potensial
• planar for vidare satsing innan idrett
• aldersgrupper 16–25 år
• utøvarar som får toppidrettsstipend frå Olympiatoppen fell utanfor målgruppa.

Vestland fylkeskommune får fagleg bistand av Olympiatoppen Vest med vurdering av søknadane. 

Kven kan søkje?

Utøvar, trenar eller særkrets kan sende inn søknaden på elektronisk søknadsskjema. Søkjaren må representere ein klubb i Vestland fylke.

Rapportering

Mottakarane av stipenda skal innan påfølgjande år gje ein kort, skriftleg rapport om korleis stipenda har vore nytta.

Les meir og søk elektronisk på vestlandfylke.no

Kulturelt utviklingsprogram er for utviklingsprosjekt og -tiltak innan kunst- og kulturfeltet. Søknadsfristen er 1. september.

Kulturelt utviklingsprogram (KUP) er eit viktig verkemiddel for større satsingar i kulturlivet i Vestland. Gjennom programmet støttar vi nyskapande og målretta utviklingsprosjekt, som er initierte av kulturlivet sjølv.

Kven kan søkje?

Offentlege eller private organisasjonar eller institusjonar kan søkje støtte frå KUP. Utøvarar med registrerte einskildføretak kan også søkje.

Primæraktivitetane til søkjarane skal vere lokaliserte i Vestland, og tiltaket må medverke til utvikling i fylket.

Kva prosjekt og satsingar kan få støtte?

Søknaden må vere innretta mot minst eitt programområde. Les meir om kva programområde som er fastsette på vestlandfylke.no.

Kultur

KUP kan støtte nye, større regionale satsingar i kulturlivet i Vestland, blant dette nyskapande og målretta utviklingsprosjekt initierte av kulturlivet sjølv. Søknadene skal gjelde 1–3-årige prosjekt og vere innan virkefeltet kunst, kultur og kunnskapsutvikling.

Idrett og friluftsliv

Det er også høve om å søkje støtte til prosjekt innan idrett og friluftsliv. Til saman 500 000 kr kan kvart år løyvast til tiltak på desse to felta.

Kva får ikkje støtte?

Vi støttar ikkje ordinær drift og investeringar gjennom KUP.

Søknadsfrist

1. september.

Retningslinjer

Du kan lese meir om blant anna vurdering, rapportering, saksbehandling, klagerett og omgrepet regional verdi i retninglinjene for Kulturelt utviklingsprogram. Desse finn du på vestlandfylke.no

Les meir og søk elektronisk på vestlandfylke.no

Vi har tilskot til store nasjonale og internasjonale junior- og seniormeisterskap. Les meir og søk innan 15. februar

Idrettslag og særforbund kan søkje tilskot til store nasjonale og internasjonale junior- og seniormeisterskap som skapar stort engasjement, samhald, motivasjon til idrettsleg satsing og positive ringverknader for næringslivet.

Kven kan søkje?

• Organisasjonsledd knytt til Norges idrettsforbund, Norges Bilsportsforbund og Det Frivillige Skyttervesen. Andre organisasjonar blir vurdert særskilt.
• Idrettslag med adresse i Vestland.

Kva kan støttast?

• Det kan søkjast om generell meisterskapsstøtte.
• Ordninga gjeld for større nasjonale og internasjonale junior- og seniormeisterskap (ikkje Norgescup).
• Meisterskap som er likestilt med nasjonale meisterskap som til dømes landsskyttarstevne kan også søke om tilskot.
• Det same meisterskapet kan støttast frå denne ordninga i tre år. Etter det kan det ev. søkjast om driftstilskot til arrangementet.

Vurdering av søknad

Kriterium som skal omtalast i søknaden:

• Tal og geografisk spreiing på deltakarar
• Rekruttering og opplæring av frivillige
• Budsjett med detaljar om påmeldingsavgift
• Krav om kommunal medverknad
• Medie- og marknadsføringsstrategi for arrangementet
• Nasjonal mediedekning
• Tyding for lokalsamfunnet i høve til lokalt næringsliv og andre samarbeidspartar
• Arrangør har ein klår og tydeleg miljøprofil (grøne arrangement)
• Vestland fylkeskommune har rett til å gjere eigne vurderingar knytt til regionale føringar og styringsdokument

Les meir og søk elektronisk på vestlandfylke.no

Via fylkeskommunen kan skular, kommunar og andre organisasjonar som arbeider med vaksne si læring (formell og ikkje-formell) søke om midlar til kompetanseheving, styrke ferdigheiter og kvalifikasjonar, og utveksle erfaringar med kollegaer i Europa.

Fylkeskommunen er akkreditert gjennom Direktoratet for høgare utdanning og kompetanse, og kan sende ein felles Erasmus+-søknad på vegne av eit konsortium, dvs. vaksenopplæringssektoren i Vestland. Deltakarar i konsortiet kan søke om midlar via fylkeskommunen gjennom heile programperioden 2021–27.

Kven kan søke?

• kommunar og vidaregåande skular
• tilsette i vaksenopplæring (formell og ikkje-formell)
• flyktningtenesta
• studieforbund
• frivillige organisasjonar
• karriererettleiing og etablerarteneste
• andre som arbeider med vaksne si læring (formell og ikkje-formell)

Målgruppe

Tilsette i formell og ikkje-formell vaksenopplæring

Kva kan de få støtte til?

De kan få støtte til reise og opphald, og kursavgift for følgande aktivitetar:

• Hospitering/reiser til europeisk samarbeidsorganisasjon
• Delta på kurs eller konferansar i Europa
• Invitere ekspert til Noreg

Prioriterte tema

• inkludering
• integrering av flyktningar
• tilbod til vaksne med grunnskule som høgaste fullførte utdanning
• vaksne med behov for opplæring i norsk
• vaksne som treng påfyll innanfor grunnleggande ferdigheiter, herunder digital kompetanse, kvalifisering av innvandrarar til auka deltaking på arbeidsmarknaden og mangfaldsleiing

Land de kan reise til

Dei 27 EU-landa samt Island, Liechtenstein, Nord-Makedonia, Serbia og Tyrkia. Det er ikkje naudsynt å vite nøyaktig kor de vil reise på søknadstidspunktet.  

Slik søkjer du

Fylkeskommunen sender inn ein fellessøknad som de kan delta i. For å bli med sender de inn ein forenkla søknad til oss ved å bruke søknadsskjema på vestlandfylke.no. Hugs vedlegg.

Vedlegg som må følge med søknaden

Signaturskjema ADU - Vaksenopplæring. Dette finn du på vestlandfylke.no.

Søknadsfrist

5. februar 

Les meir og søk elektronisk på vestlandfylke.no

Det er no mogleg å søkje om tilskot til drift av miljøorganisasjonar. Formålet med tilskotsordninga er å fremje lokalt engasjement for miljø, klima og natur i fylket. Tilskotet skal gå til driftsstønad.

Kven kan søkje

Miljøorganisasjonar med fylkes- eller lokallag i Vestland som jobbar med klima og/eller miljø.

Drift av private verksemder kjem ikkje inn under kriteria for tilskotsordninga.

Økonomisk ramme

Total ramme for denne tilskotsordninga er 500 000 kr. Det blir gitt maksimalt tilskot på 200 000 kr for kvar søknad. 

Søknadsfrist

9. mai 

Korleis søke

Digitalt søknadsskjema blir tilgjengeleg innan 14. mars.

Vilkår for tildeling

For å få tilskot, må organisasjonen dokumentere at han arbeider med konkrete prosjekt og haldningsskapande tiltak for klima og miljø.

Vurderingskriterium

Søknadar i tråd med vilkåra vil bli handsama etter følgjande vurdering og vekting:

• planlagt aktivitet eller tiltak i heile fylket: 40 prosent
• medlemsmasse i fylket: 25 prosent
• er arbeidet handlingsskapande: 35 prosent

Vurderingskriterium for fastsetting av støttebeløp

Søknadar som har låg vurdering/vekting på eit eller fleire vurderingskriterium kan få avslag/avkorta stønad.

Les meir på vestlandfylke.no

Kulturelt utviklingsprogram er for utviklingsprosjekt og -tiltak innan kunst- og kulturfeltet. Søknadsfristen er 1. september.

Kulturelt utviklingsprogram (KUP) er eit viktig verkemiddel for større satsingar i kulturlivet i Vestland. Gjennom programmet støttar vi nyskapande og målretta utviklingsprosjekt, som er initierte av kulturlivet sjølv.

Kven kan søkje?

Offentlege eller private organisasjonar eller institusjonar kan søkje støtte frå KUP. Utøvarar med registrerte einskildføretak kan også søkje.

Primæraktivitetane til søkjarane skal vere lokaliserte i Vestland, og tiltaket må medverke til utvikling i fylket.

Kva prosjekt og satsingar kan få støtte?

Søknaden må vere innretta mot minst eitt programområde. Les meir om kva programområde som er fastsette under.

Kultur
KUP kan støtte nye, større regionale satsingar i kulturlivet i Vestland, blant dette nyskapande og målretta utviklingsprosjekt initierte av kulturlivet sjølv. Søknadene skal gjelde 1–3-årige prosjekt og vere innan virkefeltet kunst, kultur og kunnskapsutvikling.

Idrett og friluftsliv
Det er også høve om å søkje støtte til prosjekt innan idrett og friluftsliv. Til saman 500 000 kr kan kvart år løyvast til tiltak på desse to felta.

Kva får ikkje støtte?

Vi støttar ikkje ordinær drift og investeringar gjennom KUP.

Søknadsfrist

1. september. 

Retningslinjer

Du kan lese meir om blant anna vurdering, rapportering, saksbehandling, klagerett og omgrepet regional verdi i retninglinjene for Kulturelt utviklingsprogram. Desse finn du på vestlandfylke.no

Programområde

Hovudutval for kultur, idrett og integrering har fastsett desse to programområda for KUP:

• formidling og deltaking
• samordning og samhandling

A. Formidling og deltaking
Det handlar om å nå nye målgrupper, noko som er både eit sosialt ansvar og eit samfunnsansvar. Nye typar kulturbrukarar og nye deltakarar i kulturlivet er nødvendig for å utvikle kunsten og kulturen i seg sjølv.

Dette programområdet skal særleg rettast inn mot tiltak og prosjekt som

• prøver ut nye former for formidling
• prøver ut metodar og tiltak for auka deltaking og publikumsutvikling
• styrker mangfaldet i aktivitet og deltaking for grupper som treng særskild tilrettelegging
• styrker arbeidet med ungdom som publikum, deltakarar og kulturbrukarar

B: Samordning og samhandling
Betre samordning og større samhandling er ein god veg å gå for å vidareutvikle kunst- og kulturlivet i fylket. Kompetansebygging og -deling er ein viktig del av dette, og det kan vere på ulike nivå, med ulike metodar og innan ulike fag, kulturfelt og kunstartar.

Vi kan gjennom samordning og samhandling vere med og bygge ein betre infrastruktur for kunst- og kulturlivet i fylket. Det vil styrke både skapar- og formidlardelen.

Dette programområdet skal særleg rettast inn mot tiltak og prosjekt som

• utviklar tenlege plattformar og arenaer for dialog, nettverk, samarbeid og kompetanse
• utviklar møteplassar og samarbeidsmodellar der frivillige organisasjonar kan auke kompetansen, utvikle nettverk og samarbeide med offentleg og profesjonell sektor
• legg til rette for samarbeid, synergieffektar og kompetanseoverføring mellom kommunar, frivillige organisasjonar, etablerte institusjonar og det frie profesjonelle feltet
• styrker kunst- og kulturtilbodet og arrangørkompetansen i fylket ved kompetanseutveksling og samarbeid mellom større kulturaktørar og mindre miljø
• utviklar pilotprosjekt som er tverrfaglege og som fremjar fellesproblemstillingar som knyt saman idretts- og kulturlivet
• utforskar nye samarbeid og samspelformer mellom ulike kunstartar og kulturformer

Les meir og søk elektronisk på vestlandfylke.no

Tilskotsordninga gjeld for aktørar og/eller aktivitetar i det profesjonelle kunst- og kulturfeltet i Vestland fylke. Tilskot skal gå til prosjekt og tiltak  med kunstnarleg/kulturfagleg hovudføremål. Prosjektet/tiltaket må ha verdi for heile eller større delar av fylket. Vi prioriterer prosjekt/tiltak som er inkluderande og utadretta, og gjev mellom anna ikkje støtte til produksjonsfasen av kunst.

Den enkelte løyvinga skal i hovudsak ligge mellom 10 000 og 100 000 kroner, og det vert vanlegvis fordelt kring 1,5 mill. kr pr. søknadsrunde.

Fullstendige retningsliner for ordninga finn du på vestlandfylke.no

Søknadsfristar 

Årlege søknadsfristar er 1. mars og 1. september. 

Kriterium for å få støtte

Tiltaket du søkjer om støtte til, må oppfylle alle desse tre absolutte kriteria for å kunne få støtte:  

• Tiltaket skal vere i samsvar med føremålet i søknadsordninga. 
• Tiltaket skal stette ei eller fleire satsingar i regional plan for kultur. 
• Tiltaket skal ha regional kulturverdi.

Det regionale ansvaret gjeld kulturoppgåver og kunst som har verdi for heile eller større delar av fylket. Fylkeskommunen har eit særleg ansvar for regional infrastruktur og utvikling av dette. Prosjekt og tiltak må bli vurderte til å ha regional verdi og/eller nedslagsfelt for å få støtte.  

Tilskotsmidlane kan gje høve til å prøve ut nye prosjekt og tiltak som kan vere med på å vidareutvikle kulturlivet i fylket, t.d. gjennom pilotprosjekt med overføringsverdi til andre.  

Vi gjev ikkje støtte til

• Innkjøp og vedlikehald av bygg, utstyr og instrument
• Tiltak/prosjekt i regi av fylkeskommunale eller kommunale institusjonar  
• Produksjonsfasen av kunst, det vere seg innan visuell kunst, musikk, scenekunst eller skjønnlitteratur
• Deltaking på seminar, utdanning, studiereiser, gjestekunstnaropphald o.l. 

Vurdering

Søknaden blir vurdert ut i frå følgjande kriterium:  

a) Utvikling av kulturlivet i fylket

b) Samarbeid og nettverk

c) I kva grad tiltaket eller prosjektet erretta utover, inkluderande og ope

d) Kvalitativt nivå på prosjekt og søknad

e) Tidlegare vist gjennomføringsevne av kulturtiltak/prosjekt

f) Støtte og forankring kommunalt og ev. nasjonalt 

Ein søknad må ikkje oppfylle alle vurderingskriteria, men jo sterkare og jo fleire av desse som vert oppfylte, dess meir relevant er søknaden for ordninga.  

Barn og ungdom har spesiell merksemd, og vi ønskjer å stimulere til at unge er aktive deltakarar i prosjektet.  

Det vert i den samla vurderinga teke omsyn til å fordele ut frå geografi og sjanger. Fylkeskommunen har eit særleg ansvar for å bidra til mangfald og breidde i kulturlivet i heile fylket. Det er såleis særleg viktig å støtte opp under kunst og smalare kulturuttrykk også i distrikta.  

Det vert ikkje gitt støtte til produksjonsfasen av kunst i denne ordninga. Dette gjeld alle kunstartar: visuell kunst, musikk, scenekunst, skjønnlitteratur. Tildelingar gjennom denne ordninga skal går til prosjekt og tiltak med tydeleg regional verdi. Det kan vere vanskeleg å vurdere denne verdien i ein tidleg fase av ein produksjon. Vurdering av kunstproduksjon vil også krevje ein annan type sakshandsaming enn det er lagt opp til i ordninga. Det er mellom anna ikkje tenleg med tildeling av tilskot  til kunstproduksjon gjennom politiske vedtak.

Les meir og søk elektronisk på vestlandfylke.no

Ordninga skal stimulere til aktivitet og eit mangfaldig kulturliv og gjeld for aktørar eller aktivitetar innan det frivillige kulturfeltet/amatørkulturfeltet. Fylkeskommunen skal vere ein regional utviklar. Prosjekt som får støtte, må difor ha regional verdi og/eller nedslagsfelt.  

Kulturpolitikken skal fremje og støtte eit sterkt frivillig kulturliv, og stimulere til nettverk og samarbeid. Barn og ungdom har spesiell merksemd, og vi ønskjer å stimulere til at unge er aktive deltakarar i prosjektet. 

Meir informasjon i retningslinjene. Desse finn du på vestlandfylke.no

Tilskotssummar og andre tilskotsordningar 

Løyvinga skal i hovudsak ligge mellom 10 000 og 100 000 kr. Dersom det ikkje er rom for å løyve minst 1/3 av søknadssummen, får søknaden avslag. For større prosjekt kan det vere aktuelt å søkje om støtte frå Kulturelt utviklingsprogram.   

Aktørar frå det profesjonelle kunst- og kulturlivet søkjer på ordninga tilskot til prosjekt og tiltak – profesjonell kunst og kultur.  

Kven kan søkje?

Ordninga gjeld for aktørar eller aktivitetar innan det frivillige kulturfeltet/amatørkulturfeltet i Vestland fylke og prosjektet eller tiltaket skal ha kulturaktivitet som hovudføremål.  

Organisasjonar, foreiningar og lag må ha organisasjonsnummer for å søkje. Privatpersonar kan eventuelt søkje tilskot på vegne av ei gruppe.

Søknadsfristar

Årlege søknadsfristar er 1. mars og 1. september.

Vurdering

Søknaden blir vurdert ut i frå følgjande kriterium: 

• Utvikling av kulturlivet i fylket, t.d. ha verdi som pilotprosjekt og bidra til større breidde 
• Dokumentasjon av kulturhistorie 
• Samarbeid og nettverk  
• At tiltaket eller prosjektet er utadretta og ope  
• Kvalitativt nivå på prosjekt og søknad
• Tidlegare vist gjennomføringsevne av kulturtiltak/prosjekt 
• Støtte og forankring i heimkommunar og evt. nasjonalt 

Ein søknad må ikkje oppfylle alle vurderingskriteria, men jo sterkare og jo fleire av desse som vert oppfylte, dess meir relevant vil søknaden vere for ordninga. Det er mogleg å søkje midlar til årvisse/faste tiltak. Søkjar må då vere merksam på at søknadene kvart år vert vurdert på nytt opp imot samla søkjarmasse.

Kriterium for å få støtte

Fylkeskommunen skal vere ein regional utviklar, så prosjektet må ha regional verdi og/eller nedslagsfelt. Det vert såleis ikkje gitt tilskot til tiltak i ein kommune – noko som i følgje kulturlova er eit kommunalt ansvar. 

Tiltaket det blir søkt om må oppfylle tre absolutte kriterium for å kunne få støtte: 

• Tiltaket skal vere i samsvar med føremålet i søknadsordninga.  
• Tiltaket skal stette ein eller fleire satsingar i regional plan for kultur.  
• Tiltaket skal ha regional kulturverdi, dvs. ha ein kommuneovergripande funksjon og/eller verdi.  

Vi gir ikkje støtte til

• Innkjøp og vedlikehald av bygg, utstyr og instrument
• Tiltak/prosjekt i regi av fylkeskommunale eller kommunale institusjonar  
• Innspeling og utgjeving av litteratur, film og musikk. (Unntak kan vere dokumentasjon med kulturhistorisk verdi). 
• Deltaking på seminar, utdanning, studiereiser, gjestekunstnaropphald o.l.

Les meir og søk elektronisk på vestlandfylke.no

Vestland fylkeskommune deler i ut 24 kunstnarstipend, kvart på 40 000 kr. Stipenda er meint å gje profesjonelle kunstnarar høve til utvikling, fordjupning eller fagleg påfyll. Søk innan 1. juni. Vestland fylkeskommune deler i 2022 ut 20 kunstnarstipend, kvart på 40 000 kr.

Sjå vestlandfylke.no for frist for neste år.

Stipenda er meint å gje profesjonelle kunstnarar – både nyutdanna og etablerte – høve til  utvikling, fordjupning og/eller fagleg påfyll. Det kan søkjast innan følgjande kategoriar:  

• visuell kunst (inkl. kunsthandverk og design)  
• musikk  
• scenekunst (inkl. dans)  
• litteratur og film  

Stipend skal også gje merksemd til dei utvalde kunstnarskapa. 

Det vert ikkje gitt støtte direkte til instrument, materiale, utstyr o.l.

Søknadsfrist

1. juni 

Kven kan søkje?

Profesjonelle kunstnarar innan alle kunstuttrykk og sjangrar som bur og har sitt verke i Vestland fylke. Det er krav om kunstfagleg utdanning eller høg realkompetanse. 

Det vert ikkje gitt støtte til personar som er under formell kunstutdanning/i ein grunnutdanningsfase.  

Stipendet kan berre søkjast av enkeltpersonar. 

Om du tidlegare har fått stipend frå Sogn og Fjordane, Hordaland eller Vestland fylkeskommune, skal det gå minst tre år før du kan vurderast for eventuelt nytt stipend.

Krav til søknaden

Søkjar må fylle ut det nettbaserte søknadsskjemaet for ordninga. Det er ikkje krav om budsjett i søknaden. Det kan visast til relevante nettlenker og leggast ved eitt PDF-vedlegg på inntil 9 MB. Det kan lastast opp lyd- og filmfiler i tillegg der dette er relevant. 

Vurdering

• Det skal leggast vekt på den kunstnarlege aktiviteten, kvaliteten og utviklinga til kandidaten
• Det blir lagt vekt på korleis søkjar gjennom søknaden presenterer seg sjølv,  og korleis ein vil nytte ein stipendperiode til kunstnarleg utvikling/fordjuping/fagleg påfyll.   
• Det er eit mål at nokre av stipenda vert tildelt kunstnarar i etableringsfasen. 
• Det er eit mål å stimulere til at det er høve til å leve og arbeide som  kunstnar i alle delar av fylket.  
• Det skal vere kjønnsbalanse i tildelinga – ut frå søkjarmassen som ligg føre. 

Vilkår for tilskot

Fylkeskommunen kan krevje betalt attende tilskot som vert nytta i strid med gjevne vilkår.

Oppfølging og rapportering

Dei som får tildeling må sende inn kort rapport på bruken av stipendet innan 3 månadar etter at stipendperioden er ferdig. Rapporten skal syne korleis stipendet er nytta, og kva resultat mottakaren har oppnådd i perioden.

Les meir og søk elektronisk på vestlandfylke.no

Vestland fylkeskommune deler ut folkemusikkstipend. Dette skal oppmuntre til kunstnarleg utvikling og styrke og sikre arbeid med immateriell kulturarv. Søknadsfristen er 1. juni.

Gå til vestlandfylke.no for frist for neste år.

Vi lyser ut

• folkemusikkstipend – eitt stipend á 60 000 kr
• Folkemusikk Ung – to stipend á 25 000 kr til søkjarar under 30 år

Folkemusikkstipenda skal gje høve til kunstnarleg utvikling og eksperimentering. Ordninga skal styrke og sikre arbeidet med immateriell og handlingsboren kulturarv.

Det vert ikkje gitt støtte til offentleg godkjend utdanning som til dømes gjev rett til studielån.

Det vert ikkje gitt støtte direkte til utstyr og instrument. 

Søknadsfrist

1. juni

Kven kan søkje

Stipenda kan tildelast musikarar, songarar og dansarar, og dei som arbeidar med dokumentasjon, formidling eller instrumentbygging. 

I vurderinga vert det lagt vekt på kunstnarleg og fagleg nivå.

Søkjarar må vere busette i Vestland, og stipenda kan berre søkjast av enkeltpersonar (ikkje grupper).

Krav til søknad

Søkjar må fylle ut det nettbaserte søknadsskjemaet for ordninga. Det er ikkje krav om budsjett i søknaden.

Du kan vise til relevante nettlenker og leggje ved eitt PDF-vedlegg på inntil 9 MB. Du kan laste opp lyd- og filmfiler i tillegg der dette er relevant.

Vurdering

• Det blir gjort ei skjønsmessig vurdering av aktivitet og kvalitet.
• Det blir lagt vekt på korleis søkjar gjennom søknaden presenterer seg sjølv, og korleis ein vil nytte ein stipendperiode til utvikling/fordjuping/ fagleg påfyll.
• To av stipenda skal tildelast søkjarar under 30 år.
• Det er eit mål å stimulere til at det er høve til å leve og arbeide med immateriell og handlingsboren kulturarv i alle deler av fylket.
• Det skal vere kjønnsbalanse i tildelinga – ut frå søkjarmassen som ligg føre.

Vilkår for tilskot

Fylkeskommunen kan krevje betalt attende tilskot som vert nytta i strid med gjevne vilkår.

Les meir og søk elektronisk på vestlandfylke.no

Tilskot til regionale partipolitiske ungdomsorganisasjonar skal styrke dei politiske ungdomsorganisasjonane i Vestland og slik bidra til auka politisk deltaking blant unge i fylket.

Ordninga skal stimulere organisasjonane som arena for deltaking, engasjement og ansvar.

Slik vil fylkeskommunen fremje medverknad, inkludering, samfunnsinnsikt, ytringsfridom og demokrati.

Kven får tilskot

Støtteordninga er meint for dei regionale ungdomspolitiske organisasjonane der moderpartiet har eitt eller fleire medlemmer i Vestland fylkesting

Krav til søkjar

• Søkjar skal ha organisasjonsnummer og vere registrert i Brønnøysundregisteret
• Moderpartiet skal vere representert i Vestland fylkesting

Følgjande dokumentasjon må liggje ved søknaden:

• Organisasjonen sitt organisasjonsnummer
• Årsmøtereferat
• Årsrapport frå året før søknadsåret
• Godkjent rekneskap frå året før søknadsåret

Søknadsfrist

Sjå vestlandfylke.no for neste års frist.

Fordeling av midlar

Dei organisasjonane som sender inn søknad innan fristen og stettar krava, skal tildelast eit grunnbeløp på 20 000 kr.

Det resterande beløpet blir fordelt mellom ungdomsparti/organisasjonar etter følgjande formel:

Moderpartiet sitt valresultat/summen av prosent på dei organisasjonen som stettar krava x (avsett sum til føremålet-samla sum av grunnbeløpa som vert utbetalt)

Tildeling

Fylkesdirektøren får fullmakt til å fordele tilgjengelege midlar ved administrativt vedtak i samsvar med desse retningslinjene.

Les meir og søk elektronisk på vestlandfylke.no

Satsinga skal fremje handverksfagleg utvikling knytt til tradert kunnskap i Vestland fylke. Stipendet er på 50 000 kr. Søk innan 1. mai.

Vestland fylkeskommune ønskjer å auke kompetansen på restaureringshandverk og å ta vare på immateriell kulturarv. Det vil vi gjere ved dokumentasjon og utøving av eldre handverkstradisjonar, med vekt på dei som er knytte til vestnorsk byggeskikk og maritim kulturarv.

Stipendet skal skape stoltheit og merksemd om den sentrale rolla tradisjonsberande handverkarar har i det å ta vare på kulturminne og vidareføre immateriell kulturarv til framtidas generasjonar.

Stipendet er på 50 000 kr. 

Desse kan søke

Profesjonelle handverkarar innan tradisjonelle handverksfag som bur og har sitt virke i Vestland fylke. Stipenda kan gå til

• tradisjonshandverkarar

dei som arbeider med:

• verktøymaking knytt til eldre handverksteknikkar
• dokumentasjon og formidling av immateriell kulturarv
• kortreist materialproduksjon

Det er krav om fullført vidaregåande opplæring med anten fagbrev/sveinebrev eller minst fem års relevant arbeidserfaring.

Søknadsfrist

Sjå vestlandfylke.no for neste års frist.

Slik søkjer du

Du søkjer på eige, elektronisk søknadsskjema, som blir lagt ut på vestlandfylke.no når det er klart.

Du må oppgje kontaktinformasjon som namn, adresse, telefonnummer og organisasjonsnummer/personnummer.

Søknaden må vere signert av ansvarleg søkjar.

Dersom søknaden er mangelfull, kan du få høve til å rette dette innan ein nærare fastsett frist. Dersom manglane ikkje er retta innan fristen, kan søknaden verte avvist. For å få stipend er det ein føresetnad at søknaden fell inn under målet for ordninga. Fullstendige retningslinjer finn du til høgre på vestlandfylke.no.

Fagleg vurdering

Ein fagkomité skal vurdere søknadane. Stipendkomiteen er rådgjevande og skal vurdere og innstille ein søkjar til å få stipend. Innstillingane skal vere grunngjevne. Det vert ikkje lagt fram offentlege vurderingar av andre enn den nominerte kandidaten.

Basert på arbeidet i komiteen skal avdeling for kultur, idrett og inkludering ta den siste, heilskaplege vurderinga og legge fram innstilling til hovudutval for kultur, idrett og integrering, som gjer endeleg vedtak i saka.

Les meir og søk elektronisk på vestlandfylke.no

Fylkeskommunen lyser ut midlar til prosjekt og kompetanseheving i biblioteka. Tilskotsordninga skal stimulere biblioteka til å prøve utviklingsprosjekt og tiltak som gir eit betre tilbod til brukarane av bibliotektenesta. Terskelen for å søke skal vere låg og ordninga gjev rom for å støtte mindre prosjekt. Det kan også søkjast om støtte til kompetanseheving.
Fylkeskommunen ønskjer å bidra til at dei kommunale biblioteka kan drive aktiv formidling, vere uavhengige møteplassar og arenaer for offentleg samtale og debatt, og til at dei kan gi innbyggjarane betre tilgang til kunnskap, litteratur og kulturopplevingar.

Bakgrunn

Til grunn for ordninga ligg behovet for å utvikle folkebiblioteka som relevante kulturarenaer, læringsarenaer og møteplassar, jf. §1 i folkebiblioteklova. Å arbeide med prosjekt er ein viktig måte å skape endring, utvikling og kompetanseheving i biblioteka.

Fylkeskommunen ønskjer å gi folkebiblioteka økonomisk støtte til å eksperimentere og prøve ut nye tiltak gjennom kreative idear. Store endringar i sektoren krev bibliotektilsette med oppdatert og ny kunnskap.

Kven kan søkje

Ordninga gjeld folkebibliotek i Vestland fylke. Ved interkommunalt samarbeid, må éin kommune vere ansvarleg søkjar.

Stønadsbeløp

Tiltak vert støtta med inntil kr. 50 000. Det er ikkje krav om kommunal eigendel.

Satsingsområde

Det blir gjeve støtte til prosjekt og tiltak innanfor desse satsingsområda:

• debatt og samtale i biblioteket
• aktiv formidling på ulike plattformer og arenaer
• inkludering
• fremjing av nynorsk språk og litteratur
• auka digital kompetanse i befolkninga
• samarbeid med andre bibliotek, barnehagar, skular, frivillige lag og organisasjonar

Det blir gjeve støtte til:

• studiepoenggivande etter- og vidareutdanning
• organisering av kurs og konferansar for bibliotektilsette i fylket

Tiltaket skal vere nytt i det aktuelle biblioteket. Det kan søkast om støtte til personalkostnader og kompetanseheving til gjennomføring av prosjekt. Innkjøp av utstyr vil berre bli støtta i den grad det er vesentleg for gjennomføring av tiltaket. Det vert ikkje gitt støtte til tiltak som bør vere del av vanleg drift.

Krav til søknaden

• Søknaden skal fremjast på elektronisk søknadsskjema. Dette finn du på vestlandfylke.no
• Søknaden skal innehalde tilstrekkeleg informasjon/dokumentasjon om prosjektet med budsjett og plan for gjennomføring.

Søknadsfrist

Elektronisk søknadsskjema og årets frist finn du på vestlandfylke.no

Tilskot til fagskular skal komme studentane til gode og skal dekke driftsutgifter for fagskuleutdanning i Vestland.

Kven kan søkje?

Alle fagskular i Vestland kan søkje om tilskot for høgre yrkesfaglege utdanningar som er godkjente av NOKUT, og som har godkjent studiestad i Vestland fylke.

Tilskotet til fagskulane skal komme studentane til gode og skal dekke driftskostnadar i utdanningstilboda.

Fristen for å søkje om tilskot frå Vestland fylkeskommune er 15. desember. (Sjå vestlandfylke.no for neste års frist.)

Tilskotsordninga

Retningsliner for tildeling av tilskot:

• Tilskotsordninga er basert på ei rammefinansiering av det einskilde studietilbodet. Tilskotet skal gje fagskulane eit driftsgrunnlag og ein stabil tilbodsstruktur
• Ordninga er basert på satsar for
- stadbaserte tilbod, eventuelt samlingsbaserte tilbod med nettstøtte
- for reine nettbaserte tilbod
• Tilskotet har like satsar for like tilbod uavhengig om fagskulen er offentleg eller privat
• Tilskotet vert fordelt i forholdet 80/20 som grunntilskot og resultatbasert tilskot. Du kan lese meir om ordninga på vestlandfylke.no
• Alle fagskular skal rapportera til DBH Fagskolestatistikk

Mål og kriterium for ordninga

Driftstilskotet til fagskular skal stimulere til god kvalitet og gjennomføring av høgare yrkesfagleg utdanning. Tilskotet skal samstundes bidra til å dekke kompetansebehova i Vestland fylke og elles i eit nasjonalt perspektiv.

Kunnskapsdepartementet har fastsett fire mål for driftstilskotet til fagskular, jf. Prop. 1 S (2018-2019).

• Høg kvalitet i høgare yrkesfagleg utdanning
Utdanningane skal vere av høg kvalitet og sikre gode vilkår for fagskulestudentane.

• Ei yrkesretta utdanning
Fagskulane skal utdanne kandidatar som kan gå rett inn i yrkeslivet, med den praktiske og teoretiske kunnskapen som det er behov for i det einskilde yrket. Det er derfor viktig å vurdere kor relevante utdanningane er for arbeidslivet.

• God tilgang til høgare yrkesfagleg utdanning
Fagskulane skal bli ein større og viktigare del av det norske utdanningssystemet, og ein større del av studentane skal velja høgare yrkesfagleg utdanning.

• Ein effektiv og solid fagskulesektor
Fagmiljøa skal ha tilstrekkeleg fagleg styrke, kvalitet og soliditet. Robuste miljø handlar også om administrativ kapasitet og kompetanse. Jf Kunnskapsdepartementets retningsliner for tilskot til drift av fagskular / Diku

Mer informasjon, neste års frist og elektronisk søknadsskjema finn du på vestlandfylke.no

Bedriftsintern opplæring (BIO) skal gå til kompetanseheving av tilsette slik at bedrifta skal klare nødvendig omstilling - enten i form av opplæringstiltak som skal fremme grøn omstilling i bedrifta, eller at opplæringstiltaka fører til digitalisering av bedrifta.

Døme på opplæringstiltak

• Opplæring som gjer det mogleg å arbeide med ny teknologi (ny produksjonsline og liknande, digitalisering). 
• Opplæring som er naudsynt for å få tilgang til nye marknader. 
• Opplæring som er naudsynt for å kunne starte utvikling av nye produkt eller tenester. 

Kven kan søkje og delta i opplæringa?

• Bedrifter kan søkje om tilskot til opplæringstiltak for sine tilsette. Vi ser det som ein styrke om fleire bedrifter går saman om søknader og undervisningsopplegg, men ei bedrift må stå som ansvarleg søkjar. Tilbydarar av kursing/undervisning kan ikkje søke på vegne av bedrifter viss dei tek betaling for oppdraget.

• Ikkje-kommersielle aktørar/medlemsorganisasjonar kan stå som søkjar på vegne av fleire bedrifter. I søknaden må det framgå kva for bedrifter som skal delta. 

• Søkjar treng ikkje å vere lokalisert i Vestland, men må kunne dokumentere at tilskotet går til opplæring av tilsette som har arbeidsstad i Vestland. 

Hovudkrav til søknad:

• At opplæringstiltaka skal fremme grøn omstilling eller utvikling i bedrifta, eller at opplæringstiltaka fører til digitalisering av bedrifta.
• At behovet for kompetanseheving i bedrifta er godt grunngjeve.  
• At gjennomføring av opplæringstiltaket har ein tidsplan på under 26 veker. Unnatak må grunngjevast særskild. 
• At tilskotet per deltakar i opplæringa ikkje er over 30 000 kr. Unnatak må grunngjevast særskild. 

Fylkeskommunen vil også vurdere:

• At tiltaket bidreg til FN sine berekraftsmål.
• At tiltaket bidreg til Berekraftig verdiskaping – Regional plan for innovasjon og næringsutvikling med handlingsprogram 2022-2025

Tilskotet kan dekke fylgjande kostnader:

• Kurshaldar/kursavgift 
• Lønskostnader i planlegging og gjennomføring av opplæringa
• Innkjøp av kursmateriell og avskriving på utstyr knytt til opplæringa
• Reisekostnader dersom det ikkje er lokale tilbod 

Søknadsfrist

Søknadsfrist 20. mai. Neste års frist finn du på vestlandfylke.no

Mer informasjon og elektronisk søknadsskjema finn du på vestlandfylke.no

Vi ønskjer å auke gjennomføringa av vidaregåande opplæring. Lærebedrifter kan difor søkje tilskot for kandidatar. Midlane skal gi lærlingar og lærekandidatar med særskilte behov og/eller med svake norskferdigheiter og kort butid i Noreg mogelegheit til å oppnå ei fagutdanning eller delar av ei fagutdanning.

Gjennomføringsmidlane erstattar tidlegare ekstraordinære tilskot frå Utdanningsdirektoratet som frå 1.januar 2020 ligg i ramma til fylkeskommunen.

Kriterium for tildeling:

• Det skal ha vore gjennomført formalisert dialog med rettleiingstenesta.
• Tilskotet skal nyttast til ekstra personalressurs for å sikre gjennomføring for lærlingar/lærekandidatar som har behov for tiltak for å nå læreplanmåla.
• Bedrifta skal ha ein plan for heile læreløpet. Planen skal innehalde konkrete oppfølgingstiltak og informasjon om kvifor lærlingen/lærekandidaten har behov for ekstra tilrettelegging.
• Bedrifta kan søke midlar for lærlingen/lærekandidaten ut året dei fyller 24 år. 
• Lærebedrifta skal rapportere til fylkeskommunen innan tre månader etter søknadsperioden er gått ut.

To typar gjennomføringsmidlar

Det er to typar gjennomføringsmidlar bedrifta kan søkje på:

Langvarige tiltak med søknadsfrist 1. juni og 1 november
Lærebedriftene kan få inntil 75 000 kr per lærling/lærekandidat i gjennomføringsmidlar. Søknaden gjeld for maksimalt eitt år om gangen, inntil 47 veker.

Kortvarige tiltak utan søknadsfrist
Lærebedriftene kan få inntil 50 000 kr i ekstra tilskot for kvar søkar til læreplass som er vanskeleg å formidle på grunn av vesentlege tilretteleggingsbehov (utprøving i bedrifta, inntil 3 mnd.).

Dette gjeld kortvarige tiltak som treng rask saksbehandling og har derfor inga søknadsfrist. Hovudregelen er at det skal ligge føre lærekontrakt før utbetaling av tilskot.

Fylkeskommunen har satt ei ramme for tilskot, dersom tal søknader overstig ramma, kan tildelinga bli lågare.

Les meir og søk elektronisk på vestlandfylke.no