FRIFOND BARN OG UNGE LNU - Landsrådet for Norges barne- og ungdomsorganisasjoner

LNU er ein paraplyorganisasjon for 100 norske barne- og ungdomsorganisasjonar, med til sammen 450.000 medlemsskap.

LNU har som mål å fremje interessene til frivillige og demokratiske barne- og ungdomsorganisasjonar. LNU vil medverke til å ta vare på og fremje mangfaldet av barne- og ungdomsorganisasjonar, slik at barn  og unge skal velje mellom, og bli kjende med ulike idear og arbeidsmåtar. Slik vil frivillige barne- og ungdomsorganisasjonar ta vare på og styrke miljø der eigenaktivitet og samarbeid blir vektlagt.

LNU har som mål å fremje solidaritet, rettferd, nestekjærleik og forvaltaransvar, nasjonalt og internasjonalt, mellom anna gjennom samarbeid og kontakt på tvers av politiske og kulturelle grenser. LNU skal arbeide ut frå FN og Europarådet sine konvensjonar om menneskerettane. Alle barn og unge må gjevast same høve til å utvikle og realisere evnene sine. For å oppnå dette må ein streve etter rettferdig fordeling av samfunnsgoda, mellom einskildmenneske, grupper, distrikt i vårt land og mellom rike og fattige nasjonar.

For LNU er det overordna at barn og ungdom skal kunne engasjere seg i demokratisk arbeid, og at alle skal vere sikra retten til å drive slikt arbeid. Gjennom eigne demokratiske organisasjonar skal barn og ungdom kunne fremje sine synspunkt både nasjonalt og internasjonalt. Frivillig innsats, mellom anna gjennom organisasjonar er avgjerande for utviklinga av demokrati, sosiale nettverk, mellommenneskeleg forståing og omsorg. Ungdom må sikrast reelt høve til medansvar og deltaking.